iour : pource que les choſes compoſees ſe reſoluent en fin en leurs commencemens, & le temps eſt l’architecte du changement d’icelles voila pourquoy l’on dit que Saturne deuoroit ſes enfans. Que Saturne ait vomy la pierre, & tout le reſte qu’il auoit aualé, que veut dire cela ſinon qu’au prix que quelques choſes meurent & prennent fin, nature en renouuelle d’autres qui s’emparent de leur place ? Car voicy ce que dit Sophocle en Aiax ;
Tant peut le temps long & ſans nombre, Que ce que l’on ſçait, il l’enombre
L’enueloppant d’obſcurité, Mais il fait venir en clarté Ce dequoy l’on n’auoit que l’ombre.
Or que Saturne ſoit le Temps, & rien autre, qui deſtruit tout, & produit tout, ce vers d’Orphee en l’hymne de Saturne le montre :
Qui produis toute choſe, & deſtruis tout auſſi.
Et Eſchyle és Eumenides :
Le temps tout à coup vieilliſſant Vient toutes choſes fleſtriſſant.
Et ne faut s’eſtonner, puiſque nous diſons que Saturne eſt le Temps, ſi l’on en a faict vn Dieu, veu que Sophocle en l’Electre appelle ouuertement le Temps, Dieu.
Le temps eſt vn Dieu tres-facile.
Car puiſque le Soleil tire tantoſt vers le Septentrion, tantoſt vers le Midy, & rameine tantoſt l’eſté, tantoſt l’hyuer, & que ſelon les ſaiſons tout ce qui s’engendre & ſur la terre & dans la mer, tire de luy les commencemens & les cauſes de ſa naiſſance : c’eſt à bon droit qu’Orphee qualiſie Saturne, Pere des hommes & des Dieux :
Saturne porte-feu, Pere aux Dieux & aux hommes.
Faulx de Saturne pourquoi cachee en Sicile.Il ſemble que ceux qui luy ont faict porter la faulx, n’ayent entendu autre choſe, ſinon que Saturne fuſt le temps meſme, qui trenche tout, renuerſe tout, terraſſe tout ; ioint que les Anciens la font auſſi porter au Temps :
Le Temps par ſa longueur et pierre & fer ameine A rien, & trenche tout de ſa faulx inhumaine.
Ils content que la faulx, ſoit de Iupiter, ſoit de Cerés, fut cachee en Sicile, à cauſe de ſa fertilité & grand rapport de bled, & d’autres choſes neceſſaires à la vie humaine. Car la Sicile eſt l’Iſle preſque la plus fertile de toutes, comme eſcrit Polybe au 1. liure de ſon hiſtoire. Et le plus renommé d’entre les Poëtes Grecs en parle ainſi :
Il n’eſt point de beſoing luy deſchirer l’entraille Au coutre
fend-gueret, ny fourny de ſemaille. Elle de ſon bon gré & propre mouuement, Porte orge, porte bled, & maint bois de ſarment