gros marteau de fer ; & les Dieux qui le coſtoyent le pouſſent du Ciel en terre, comme indigne de leur compagnie, mais luy chû en Lemne, ſe met à forger les foudres, tellement qu’aupres de luy eſtoit touſiours peinte vne forge & vn Aigle, attendant qu’il euſt acheué quelque foudre pour l’emporter à Iupiter. Pour cette raiſon Agathocle és Commentaires qu’il auoit eſcrit de l’art de forger de Vulcan, dit qu’il y auoit en Sicile deux Iſles, l’une nommee Hiere, & l’autre Strongyle, deſquelles nuit & iour le feu ſortoit : cependant au 7. liure de ſes hiſtoires il dit que l’vne eſtoit à Æole, l’autre à Vulcan. C’eſt ce qui a induit Apollonius Rhodien au 4. des Argo-Nochers, où il parle des iſles de Lipare & Strongyle, à dire que les enclumes de Vulcan eſtoient là :
—puis aller derechef Au bord où retentit de Vulcan chaſque enclume Sous les coups des marteaux, & l’eau boüillonnant fume.
Iuuenal en ſa 13. Satyre le touche auſſi :
Et Vulcan eſſuyant, alteré de Nectare, Ses bras noir-enfumez en ſa forge à Lipare.
Deſcription de l’iſle de Lipare.Or Lipare a eſté puiſſante, & iadis eſtendoit bien loing les bornes de ſa ſeigneurie, apres qu’elle eut receu vne peuplade de Cnidiens. Elle s’appelloit auparauant Meligunis, & pendit au Temple d’Apollon, en Delphe, beaucoup de deſpoüilles & vn riche butin, fait ſur ſes ennemis. Elle auoit vne terre alumineuſe, & pluſieurs bains chauds auſſi-bien que la Sicile, & des feux ſortans de terre. Entre elle & la Sicile il y auoit vne autre iſle, qu’on diſoit eſtre dediee à Vulcan, toute pierreuſe, deſerte & pleine de feux. Elle auoit trois gouffres, comme trois gueules de feu ; du plus grand deſquels on voyoit ſortir de groſſes maſſes de flamme embraſee, mais depuis ils ſe ſont bouchez. On a connu par l’obſeruation & recherche d’iceux, que les vents cauſoient ce feu qui ſe voyoit là, & au Mont-gibel. Et ne faut pas trouuer cela eſtrange, puiſque les vents s’engendrent & ſe nourriſſent, prenans leur commencement des vapeurs de la mer, comme de leur plus proche matiere. On dit que le plus grand gouffre contenoit en rond 625. pas : que ſi le vent de Midy deuoit ſouffler, il s’eſpandoit autour de l’iſle vn broüillars ſi grand & ſi eſpais qu’on ne pouuoit deſcouurir la Sicile : mais ſi c’eſtoit la biſe, la flamme ſortant s’eſleuoit en haut, & bruyoit beaucoup plus fort : ſi le vent venoit d’Occident, il gardoit vne moyenne meſure. Les autres bouches eſtoient égales, mais ne iettoient pas ſi grande quantité de vapeurs : & ſelon le bruit qu’elles faiſoient, & le lieu d’où elles commençoient à ſiffler, & au prix que les flammes & nuees eſtoient, ou groſſes, ou petites, on connoiſſoit trois iours deuant quel vent deuoit tirer. Et quand il ne faiſoit pas bon démarer de Lipare, Vulcan (ou ſelon