mauuais conſeils : & pourtant vous ſurprendrez ordinairement telle maniere de gens en peché. Mais les loix ne cherchent & ne procurent que ce qui eſt iuſte, honneſte & profittable. Et quand elles l’ont trouué, elles enioignent generalement & egalement à toutes perſonnes de quelque eſtat, qualité & condition qu’elles ſoient : & cela s’appelle Loy, à laquelle il faut que tout le monde ſans exception obeïſſe pour beaucoup de raiſons ; mais principalement parce que toute loy eſt inuention & bienfaict des Dieux, l’ordonnance ſelon laquelle les Sages ſe reiglent et comportent, la correction & chaſtiment de ceux qui ou à leur eſcient ou par meſgarde tranſgreſſent, & la preſcription propoſée à tout vn Eſtat, ſelon laquelle il faut que chacun en particulier dirige ſa vie & ſes actions.
Mais d’autant que les Anciens ont diuerſement expoſé leurs Fables ſelon la verité des euenemens, ſi bien que les vnes concernoient les choſes naturelles, les autres l’Aſtronomie, les autres les mœurs, les autres toutes ces choſes enſemble, il faut examiner que ſignifie l’adultere de Mars auec Venus.
Explicatiõ
de l’adultere de Mars auec Venus.Qu’y a-il en ce monde de ſi contraire que tuer & procreer, baſtir & deſtruire, dreſſer & renuerſer ? Cependant Mars qui fait tout ce que deſſus, comme dit Homere,
Mars meurtrier des humains, qui deſtruis champs et villes,
habite auec Venus, qui produit & met en lumiere toutes ſortes d’animaux & de plantes. Que naiſtra-il de cette conionction ſi diſcordante ; certes rien, principalement ſi Vulcan ſuruient. Car il faut prendre Mars & Venus pour diſcord & pour amitié ; & Vulcan, c’eſt à dire la chaleur exceſſiue, eſtouffe tous les deux,
ſurmõte
leurs principes, & les empeſche de faire leurs functions. Ils ont doncques mis en auant ces fictions fabuleuſes, pour faire entendre que les affaires de ce monde ont beſoing d’vne ſymmetrie & proportion pour s’enretenir & ſe conſeruer en leur eſtre. Nous auons cy-deſſus touché que quelques-vns des
anciẽs
ont eſtimé le Soleil & luy n’eſtre qu’vn : & les Aquitains de là les Pyrenees, peuples d’Eſpagne, adoroient en toute humilité & religion l’idole de Mars ayant le chef enuironné de rais comme le Soleil. Auſſi ſemble-il que raiſon & nature requierent que ces corps celeſtiels qui cauſent la chaleur aux choſes d’icy bas, ſoient plus differents en leurs noms qu’en leurs effects. Homere au 15. de l’Iliade prend (ce ſemble) Mars pour vne vertu ignee.
S’esfare comme Mars vaillant, ou force ignee.
Pouruoy Mars auoit Bellone pour chartier.Ils ont fait accroire que Bellone eſtoit Cocher de ce Mars gaſte-tout, d’autant que l’air peſtilentiel ameine & cauſe la mort. Quelques-vns ont eſcript qu’on auoit donné à Mars le tiltre & qualité de Dieu guerrier, parce qu’il fut le premier qui trouua le moyen & l’vſage de s’armer, de dreſſer vne armee, & tout ce qui eſtoit expedient pour la guerre, s’eſuertuant d’exterminer les meſchans & impies.