De Neptun.
CHAPITRE IX.
Parenté de Neptun.NEPTVN fils de Saturne & d’Ops, comme nous auons dit, courut meſme fortune que Iupiter, & peu s’en falut qu’il n’eſprouuaſt en ſa perſonne la cruaute de ſon pere. Car aprés que Rhee eut enfanté Neptun, elle le cacha dans vne bergerie, parmy des aigneaux, & le bailla aux Bergers pour le nourrir, & faiſant ſemblant d’eſtre accouchee d’vn Poulain, le donna à ſon mary pour le deuorer. Iſace eſcrit que Neptun fut nourry par Arno, ainſi nommee du Grec arneín, c’eſt à dire nier, d’autant que comme Saturne cerchoit Neptun, elle reſpondit qu’elle ne l’auoit pas, & le nia : d’où auſſi vne ville de Bœoce fut ainſi appellee, qui auparauant ſe nommoit Sinuſe, comme dit Theſee au 3. liure de l’Eſtat de Corinthe. Il y en a d’autres qui veulent qu’elle ait obtenu ce nom de la trouppe d’Agneaux, parmy leſquels Neptun fut nourry. Au contraire les autres maintiennent que Iunon l’eſleua & nourrit. Or ſi toſt qu’il eut donne eſcorte à Iupiter és guerres qu’il eut apres auoir chaſſé Saturne hors de ſon Royaume, partageans entre-eux l’Empire de tout le monde, Neptun eut pour ſoy la mer & toutes les iſles, Iupiter le Ciel, & Pluton les Enfers, comme nous auons veu en Iupiter. Neptun marié par l’interceſſion d’vn Dauphin.Il eut à femme Amphitrite, laquelle aymant eſperduëment, & ne la pouuant par aucun moyen induire à le contr’aymer, il enuoya vn Dauphin, pour l’attirer à ſon amour, & luy perſuader de l’eſpouſer. Ce que le Dauphin ayant obtenu, afin que la memoire d’vn ſi grand bienfaict demeuraſt eternellement, le ſigne du Dauphin fut ſitué entre les Eſtoilles, comme dit Hygin és Fables des eſtoilles, & a le meſme Dauphin ſa place aſſez prés du Capricorne, ſelon le rapport d’Arat és Aſtronomiques. Les autres Dauphins eurent auſſi leur part