dans la riuiere, qui fut pour ce regard dicte Aſtree. Item, Caïque de Caïque fils de Mercure & d’Ocyrhoé, comme eſcrit Leon de Conſtantinople au 3. liure des riuieres : & Melane, de laquelle le Nil fut nommé Melas : Actorion, Borgion, Bronte, Buſiris Certion, Crocon, Crome, Chryſaor, Cenchree, Chryſogenee, Chie, Dore, Eupheme, Ircee, Lelex, Lamie propheteſſe & Sibylle, Hallirhot, Leſtrygon, Megaree, Meſape, Ephialte, Nyctee, Melion, Naulrhoë, Othe, Occipite, Polypheme, Pyracmon, Phorque, Pelaſgue, Oncheſte, Pheaz, Pegaſe, Phoque, Perat, Sicule, Sican, Sterope, Tare, Theſee, Tarante, Tyret, & vne infinité d’autres : car i’en ay leu plus de quatre-vingts, qu’il n’eſt beſoin de nommer icy, comme eſtant choſe plus ennuyeuſe que proufittable.
Chefs d’œuure de trois Dieux s’entrequerellans.Lucian en ſon Hermotime eſcrit, que Neptun, Minerue & Vulcan gagerent vn iour à qui feroit vn plus beau chef-d’œuure, que Minerue baſtit vne maiſon, Vulcan forgea vn homme, & Neptun fit vn Taureau, d’autres diſent vn Cheual : & que pour cette raiſon ſes deſcendans ont creu qu’il auoit le premier dreſſé les Cheuaux. Nous auons veu cy-deſſus comment il eut en partage la mer. Herodote en ſa Polymnie eſcrit que les Theſſaliens diſoient ordinairement que Neptun auoit fait vn eſgouſt & foſſé par où couloit le Penee riuiere de Theſſalie, dicte auiourd’huy Salampria, & que ceux qui penſent que Neptun esbranſle & eſloche la terre, ont raiſon de le croire. Herodote eſt de ceux qui tiennent que les eaux ſont cauſe des tremblemens de terre, non-pas les vents enclos ſous terre, qui courans çà & là ne cherchent que paſſage pour s’enfuyr, comme l’enſeigne Ariſtote au 3. des Meteores, & Lucrece au 6.
Cauſe du tremblement de terre.
Les vents ſont emportez dans les creux de la terre, Ou l’vn l’autre de prés par
heurtades ſe ſerre D’vn choc reïteré, puis de coups drus & ſorts
S’entrepouſſent ſi bien, que l’un l’autre met hors. Le chaſſé cherche place, & d’vne force altiere Court deçà, court delà, pour rompre ſa barriere. Cette cauſe de vents qui taſchent à ſaillir, Fait d’un tremblant effroy la terre treſſaillir.
Charges de Neptun.Ce Dieu-cy auoit deux charges, des nauigeans, & des Cheuaux, comme Homere dit en ſes Hymnes :
Les Dieux t’ont aßigné double office, Neptun, Eſcheuz auec honneur en partage commun, De dreſſer les Cheuaux plus fougueux, plus ſauuages, Et ſauuer les vaiſſeaux qui voguent, de naufrages.
Surnõs.Orphee en dit autant en ſes hymnes : & pour cette cauſe il y auoit en Arcadie ſur la riuiere de Milaonte vn Temple dedié à Neptun Ondoyant, ou Desbordé, ainſi ſurnommé, d’autant que lors