—deux Taureaux, ſçauoir l’un Pour toy bel Apollon ; l’autre pour toy Neptun.
Cette inſtitution vint de l’ordonnance de l’Oracle. Car on dit qu’il arriua vn iour à Corfou, que durant les guerres des Perſes, leur eſtant demeuré quantité de bœufs, vn Taureau reuenant de brouter, ſe print à meugler par pluſieurs fois vers la mer, & ſe tint là tout le reſte du iour : puis aprés le bouuier s’approchant de la mer, vid vn nombre infiny de Thuns, ce qu’il rapporta à ceux de Corfou. Ils ſe mirent donc en deuoir d’en prendre, mais en vain. Et pourtant ayans demandé l’aduis de l’oracle, on leur reſpondit qu’il falloit offrir en ſacrifice vn Taureau à Neptun. Ce qu’ayans faict, ils firent vne tres-belle peſche de Thuns. Vn temps fut auſſi qu’on luy ſacrifioit des Thuns. Marc Manile au 2. liure de l’Aſtronomie, dit que le ſigne des Poiſſons eſt conſacré à Neptun, racontant les ſignes celeſtes appropriez à chaque Dieu :
Pallas a le Belier, & Venus le Taureau, Phebus en garde prend l’un & l’autre Gemeau, La Lune, le Cancer, de Iupin & Cybele Le Lion eſtoillé ſe tient en la tutelle : La Liure eſt à Vulcan ; & la Vierge à Cerés. Le Scorpion guerrier du preux Mars ſe tient prés, Diane du Chaſſeur la croupe cheualine Regit ſous ſon pouuoir : c’eſt Veſta qui domine Deſſus le bouc cornu. Le ſigne de Iunon Aduerſaire à Iupin a deſſous ſon guidon Le Vers’eau : & Neptun en la plaine liquide Reconnoiſt les Poiſſons eſtre deſſous ſa guide.
Suite de Neptun.Neptun eſtoit touſiours accompagné de grand nombre & ſuitte de Dieux marins & de Nymphes, deſquels Virgile en nomme quelques-vns.
Vn eſcadron diuers de compagnons le ſuit : Les Balenes monſtrueux, la ſuitte du vieil Glauque, L’Inoë Palemon, les Tritons promps, de Phorque Le regiment entier, grands, moiens & petits. A l’aille gauche vient & Melite & Thetis, Cymodoce, Spio, la vierge Panopee, Suiuies quant et quand de Thalie & Neſee.
Ses amours.Ouide eſcrit que ce Dieu ſe transforma en diuers corps pour iouyr de ſes amours : au 6. de ſes Metamorphoſes, en la deſcription de l’ouurage d’Arachné :
Dauantage elle peint comme le Dieu Neptune Enflammé d’vn chaud feu d’amour qui l’importune Sans ceſſe, ſans repos, d’vn changement nouueau