Quelques-vns l’appellent le plus meſchant & pernicieux de tous les Dieux, contre qui Timocreon Rhodien a compoſé vn air de poëſie conuiuale, qui commence :
Tu ne deuois aueugle Plute, Par qui le monde n’a que maux,
Paroir qu’és manoirs infernaux : Là doit eſtre ton giſte et butte, Non ſur terre te proumener, Ne deſſus les flots de la mer.
Theocrite ne croit pas qu’il ſoit aueugle ; & Platon au premier liure des loix eſcrit que Plute n’eſt pas aueugle, mais clair-voyant. Quelques-vns l’ont tenu pour Dieu, & l’ont honoré plus que pas-vn autre, comme teſmoigne Theognis :
Plute, le plus gentil, le plus plaiſant des Dieux Qui repaire ſous terre, en la mer, ou és Cieux,
Quoy que ie ſuis meſchant, ſi tu me fauoriſe, On me donnera los d’auoir la grace acquiſe D’vn tres-homme de bien.—
Ce meſme Dieu que les vns ont tenu en reputation d’eſtre tres-puiſſant, les autres l’ont eſtimé tres-imbecille & de peu de force, pource qu’il ne pouuoit eſleuer és honneurs les hommes deſpourueus de vertu, ou les maintenir apres les auoir eſleuez. Voila pourquoy cecy a eſté gentiment dict :
Richeſſe ſans vertu ne peut eſleuer l’homme, Ny la vertu celuy que l’indigence aſſomme.
Car pour rendre l’homme heureux il faut neceſſairement que toutes les deux s’accordent & ſe rencontrent. Il eut vne fille nommee Eurybœe, de laquelle fait mention Apollodore au 1. de ſa
Biblioth.
Mais bien ſot ſera celuy qui penſera que Plute ait eſté ou Dieu ou quelque autre choſe, d’autant que les Anciens ont commis quelque Dieu particulier à chaque mouuement d’eſprit, afin qu’on ne penſaſt qu’il y euſt choſe aucune qui ſe gouuernaſt que par la prouidence de Dieu.
¶
Expoſitiõ
phyſique de la Fable de Plute.Examinons maintenant que veut dire tout cecy. Plute eſt fils de Iaſion & de Cerés, d’autant que les biens viennent du reuenu des tertes, & de la diligence des laboureurs. Or Iaſion eſt dit d’vn mot Grec ſignifiant guerir ou remedier, parce que Cerés guerit & remedie à la pauureté des hommes. Que ſignifie ce meſchant & impie traict, que Iupiter ait creué les yeux à Plute, par enuie qu’il portaſt aux gens de bien ? la bonté diuine peut elle bien fauoriſer les meſchans, & perſecuter les bons ? Puis que Iupiter eſt la deſtinee, & cette vertu de l’entendement diuin, qui gouuerne les affaires de ce monde, qui tranſporte, tantoſt çà, tantoſt là, les biens & commoditez, ſelon le ſecret inexplicable, plaiſir & iugement de Dieu, aucuns ont eſtimé que